प्रबुद्ध युवा समूहले जिल्ला प्रहरी कार्यालय बागलुङको सहकार्यमा प्रत्येक शनिबार सञ्चालन गर्दै आएको “शनिबार सरसफाइ अभियान” को तेस्रो हप्ताको कार्यक्रम सफलतापूर्वक सम्पन्न
प्रबुद्ध युवा समूहले सामाजिक उत्तरदायित्वलाई केन्द्रमा राख्दै बागलुङ बजार क्षेत्रमा सञ्चालन गर्दै आएको “शनिबार सरसफाइ अभियान” को तेस्रो हप्ता पनि सफलतापूर्वक सम्पन्न भएको छ।
जिल्ला प्रहरी कार्यालय बागलुङको सहकार्य र बागलुङ नगरपालिकाको सहजीकरणमा निरन्तर रूपमा सञ्चालन भइरहेको यस अभियानले स्थानीय समुदायमा सकारात्मक प्रभाव पार्दै आएको छ।
यस अभियान केवल सरसफाइ मात्र नभई सामाजिक चेतना अभिवृद्धि गर्ने, वातावरण संरक्षण गर्ने तथा युवाहरूलाई समाजसेवामा सक्रिय बनाउने उद्देश्यले सञ्चालन हुँदै आएको हो।
प्रहरी कार्यालयले जनशक्ति सहयोग र नगरपालिकाले सरसफाइ सामग्री उपलब्ध गराउँदै अभियानलाई व्यवस्थित र प्रभावकारी बनाएको छ।
मिति २०८३ साल वैशाख २६ गते हल्लनचोक क्षेत्रमा सम्पन्न तेस्रो चरणको अभियानमा स्थानीय समुदायको सक्रिय सहभागिता रहेको थियो। स्थानीय व्यापारी, विद्यार्थी तथा सर्वसाधारणले अभियानप्रति सकारात्मक प्रतिक्रिया जनाउँदै बजार क्षेत्र सफा हुँदा वातावरण सुधार भएको बताएका छन्।
प्रबुद्ध युवा समूहका अध्यक्ष रोहित सुनार (मार्टिन) ले “सफा सहर, सभ्य समाज” निर्माणका लागि सबै नागरिकलाई अभियानमा सहभागी हुन आग्रह गर्नुभएको छ।
समूहले आगामी दिनहरूमा पनि बागलुङका विभिन्न क्षेत्रहरूमा नियमित रूपमा सरसफाइ अभियान सञ्चालन गर्ने योजना बनाएको छ।
← Back