ग्रेस इन्टरनेशनल बागलुङ पुनः मुख्य प्रायोजक

प्रबुद्ध युवा समूहको आयोजनामा हुन गइरहेको गण्डकी प्रदेशस्तरीय दोस्रो अन्तरविद्यालय तीज नृत्य प्रतियोगिता–२०८३ को मुख्य प्रायोजक (Title Sponsor) को रूपमा ग्रेस इन्टरनेशनल बागलुङ (Grace International Baglung) जोडिएको छ। यसअघि पनि प्रबुद्ध युवा समूहद्वारा आयोजित विभिन्न सामाजिक, सांस्कृतिक तथा युवामुखी कार्यक्रमहरूमा निरन्तर सहकार्य गर्दै आएको ग्रेस इन्टरनेशनल बागलुङले यस वर्षको तीज प्रतियोगितामा समेत मुख्य प्रायोजकको रूपमा साथ दिएको हो। यस सहकार्यले प्रतियोगितालाई अझ भव्य, व्यवस्थित तथा प्रभावकारी रूपमा सम्पन्न गर्न महत्वपूर्ण योगदान पुग्ने आयोजकले विश्वास व्यक्त गरेको छ।

गण्डकी प्रदेशस्तरीय दोस्रो अन्तरविद्यालय तीज नृत्य प्रतियोगिता–२०८३ आगामी भाद्र २१ गते सुम्मिट चोक, बागलुङ मा आयोजना हुनेछ। गण्डकी प्रदेशका विभिन्न विद्यालयहरूको सहभागिता रहने यस प्रतियोगिताले नेपाली मौलिक तीज संस्कृति संरक्षण, विद्यार्थीहरूको प्रतिभा प्रस्फुटन, कला तथा संस्कृतिको प्रवर्द्धन र विद्यालयहरूबीच स्वस्थ प्रतिस्पर्धाको वातावरण सिर्जना गर्ने उद्देश्य लिएको छ। प्रतियोगितामा उत्कृष्ट प्रस्तुति दिने विद्यालय तथा विद्यार्थीहरूलाई आकर्षक नगद पुरस्कारसहित सम्मान गरिनेछ।

प्रतियोगितामा प्रथम पुरस्कार रु. ५५,५५५, द्वितीय पुरस्कार रु. २७,५५५ तथा तृतीय पुरस्कार रु. १५,५५५ प्रदान गरिने आयोजकले जनाएको छ। साथै सहभागी सम्पूर्ण विद्यालयलाई सहभागिता प्रमाणपत्र प्रदान गरिनेछ भने उत्कृष्ट प्रस्तुति, मौलिकता तथा सिर्जनात्मकतालाई विशेष प्राथमिकता दिइनेछ।

प्रबुद्ध युवा समूहले यस प्रतियोगितामार्फत नेपाली मौलिक तीज संस्कृतिको संरक्षण र प्रवर्द्धन गर्नुका साथै विद्यार्थीहरूमा लुकेका प्रतिभालाई राष्ट्रिय स्तरसम्म परिचित गराउने लक्ष्य लिएको जनाएको छ। प्रतियोगितालाई सफल बनाउन स्थानीय सरकार, विभिन्न संघ–संस्था, शैक्षिक संस्था, व्यवसायी तथा शुभेच्छुकहरूको साथ र सहयोग रहने विश्वास व्यक्त गर्दै आयोजकले सम्पूर्ण विद्यालय, विद्यार्थी, अभिभावक तथा दर्शकहरूलाई कार्यक्रममा सहभागी भई प्रतियोगिताको गरिमा बढाइदिन हार्दिक अनुरोध गरेको छ।

कार्यक्रमको मुख्य प्रायोजकको रूपमा साथ र विश्वास प्रदान गर्दै आएको ग्रेस इन्टरनेशनल बागलुङ प्रति प्रबुद्ध युवा समूहले विशेष धन्यवाद तथा आभार व्यक्त गरेको छ। साथै आगामी दिनहरूमा पनि सामाजिक, शैक्षिक तथा सांस्कृतिक गतिविधिहरूमा यस्तै सहकार्यलाई निरन्तरता दिने अपेक्षा आयोजकले व्यक्त गरेको छ।